يا لله يا منشي حقوق الغمامي
يا معتلي يارب الأحيا والأموات
نطلبك جنبنا الزلل والأثامي
وأجبر عزانا فالنفوس العزيزات
وأنك تصبرنا بحسن المقامي
إلى فقدنا بيننا مثل صنهات
النادر اللي فالقبيلة علامي
نجمٍ لمع واقفت اظعونه سريعات
يا صقر راح اللي يسقي الظوامي
اللي لجيرانه يدينه نديات
أمسيت من فقده صويب الهيامي
وجريت من بين المعاليق زفرات
وغيري بكوه مجودين المرامي
الغانمين اللي خطاهم طويلات
وكهولنا واللي بسن الفطامي
ضجوا وشكواهم لرب البريات
وش لون ما نبكي زعيم الكرامي
مكرم الضيفان بالحشو والشاة
ما يذبح الا نابيات السنامي
فاللين ولا فالوقوت العصيبات
رجل لتقديم التراحيب حامي
شعاره الترحيب في كل الاوقات
انا اشهد انه يستحق الوسامي
اشرف وسام عن اليدين البخيلات
صميدعٍ لحقوق ربعة محامي
ولا يستمع لمزيفين الشعارات
ومجددٍ لتراثنا كل عامي
يمد من كفه عطائي جزيلات
كفٍ عساها في نعيم الرحامي
في رحمةٍ من عند رب السموات
برضاه فالجنه وحسن الختامي
من جود فضلك يا مجيب الدعوات
وعوّض عزانا فيه حرٍ اقطامي
ضيف الله اللي للوفا فيه اشارات
مرفوع رأسه من اجدود وعمامي
ولا هو غريب منزله فالرفيعات
واخوانه اللي له ادروع حشامي
بالقدر لا هانوا نفوس كريمات
من شجرةٍ تثمر بطيب النوامي
أمسيسة عند العواويد باثبات
واختامها مني صلاة وسلامي
على رسولٍ خصّنا بالرسالات
"مدارات شعبية"