جيتك مسافر واحمل هموم واحزان
مدري وش اللي صاب رجلك وسويت
سألت عنك وقيل بالحيل تعبان
وضاق المجال ومن غلا سيدي جيت
اثرك اليا من غبت يا طير حوران
تضيق فينا الدار لا منك ابطيت
وشلون لو يدرون ناسٍ وخلان
انك عليل ومن عنا الرجل مليت
والله التلقاهم شباب وشيبان
في مجلسك حتى يقولوا تشافيت
يدعون وال العرش رحمة وغفران
انك تشافى وبحياتك تهنيت
رجلك سببها طيبها يا بليهان
تبغى مثل مدات يدك اليا أعطيت
من كثر ما تاقف بها وقفة انسان
حتى الألم حسيت به واستمريت
وصبرت من طبعك بتثبيت وايمان
وسويتها بالعزم عن قول يا ليت
لأجل المواطن تسمعه سمع الأذان
ما تأخذ الدعوى بليا تثابيت
تسمع منه دعواه من دون نقصان
هو يتطمن وانت منه اطمئنيت
يا سيدي شيء نشوفه بالأعيان
عن حاجة المسكين ما يوم صديت
تاقف ووقفاتك لها روح واثمان
ولا فيه يوم عن رفيقك تخليت
يا بو سعد ان كان للطيب عنوان
انا اشهد انك واضحن ما تخفيت
الطيب ساسك يا سلايل كحيلان
من ساس ابوك وساس جدك تربيت
ما بين عبد الله وما بين سلطان
والا خوالك باللقاء صيتهم صيت
قلته وابا قوله ولاني بغلطان
ان القصايد فيك لو قلت ما أوفيت
بس الشعور يثيرني بعض الأحيان
اني اقول البيت واكتب ورى البيت
والا أنت نجم بالشعر عالي الشان
بحروف ابو خالد سطعت وتعليت
والك السلامة دوم من قلب ولسان
والا الغلا لو قلت ما مثلك اغليت
"الرأي"