مرحوم يا شيخٍ على الطيب محسود
شيخٍ شرى الناموس والذل باعه
شيخٍ على فعله براهين وشهود
يا صعب وقفاته ويا طول باعه
فضله على كل العرب ما له حدود
فعلٍ عليه شهود ما هو ب إشاعه
شيخ الشجاعه كل ما ثار بارود
جود زمام الحرب يوم اندلاعه
اليا وقف في وقفته للعرب زود
دايم على الناموس تسبق ذراعه
بين العرب حبلٍ له سنين معقود
حل العقود ولم شمل الجماعه
من حكمته كلٍ على الحق مردود
تصالحوا عقب الجفا والقطاعه
يبكي عليه اللي من الوقت مضهود
أقفى رجاه ولايع الحزن لاعه
خيّم علينا الحزن والحيل مهدود
ساعة سمعنا بالخبر فالاذاعه
غاب القمر من يوم حطوك فالعود
وللي سمع ذاك النبا الشين راعه
خليتنا واللي تخليه مقرود
مير العوض فاهل الكرم والشجاعه
عبدالله اللي كنه السيف مجرود
الحكم عند اللي يحفظ الوداعه
مثل الجبل ما يخلفه ذاري النود
يهد حيل أهل العزوم ارتفاعه
وسلطان سلطان السعد درع وعضود
ليث العرين الي تهابه سباعه
قوي باس وكل ما فيه محمود
يزيد فوق الناس مده وصاعه
نعم الخلف عقب السلف قمة الجود
هانت مصيبتنا وزدنا مناعه
يا الله ياللي عندك الخير موجود
ياللي على الكون الوسيع اطلاعه
تجبر عزا محمد وسلطان وسعود
وعبدالعزيز اللي معه كل ساعه
كن الليال البيض فعيونهم سود
يوم الفراق ويوم حزت وداعه
قبرٍ عساه يصير بستان وورود
نورٍ على نورٍ يولع شعاعه
الموت دربه ياهل العرف مسدود
لا حيلةٍ تنفع ولا به شفاعه
دنياك هذي بين فاقد ومفقود
لأمر الله المعبود سمعاً وطاعه
"مدارات شعبية"