يا شين علمٍ يوم الاثنين جانا
ياشين ذاك العلم ساعة سمعناه
أظلم نهارٍ فيه علمه لفانا
مثل ظلام الليل والله والله
كلت عزايمنا وتزايد بكانا
على فراق الوالد اللي فقدناه
وتعذرت عن المسيره أخطانا
وكلٍ قعد يبكي فهدنا وينعاه
والنوم حاربنا ولا عاد جانا
والعين زود حزنها كثرة أبكاه
على الحبيب اللي فراقه دهانا
فقيده الإسلام يا صعب فرقاه
سيد ملوك الأرض في ذا الزمانا
رافع لوا الإسلام في كف يمناه
له في حنايا القلب قدر ومكانا
ما ظنتي شعبه مع الوقت ينساه
الوالد اللي ضمنا واحتوانا
ومن كثر حبه ضمنا في حناياه
ويا كم من وقته وجهده عطانا
ولاجل الوطن ثم لاجلنا تعبت خطاه
ياما تعب من اجلنا واعتنانا
وسخّر لنا الصعبات بالمال والجاه
بدل ملاح الما بحلو وسقانا
من كف يده صافي الما شربناه
ما يوم عنا لاذ ولا توانا
أبوٍ حنون وكلنا طوع يمناه
هو عزنا هو ظلنا هو ذرانا
اللي ليا ضاقت علينا زبناه
لو ينفدا نفداه في كل شانا
أرواحنا وولادنا كلها فداه
لا شك هذي دايرات الزمانا
حكم القدر خيره وشره رضيناه
ويالله يا المعبود تقبل دعانا
يا الواحد اللي كل خلقه ترجاه
يا الوالي اللي لك دعانا رجانا
رجواك عنا باحسن الخير تجزاه
وتجعل مقره في نعيم الجنانا
وتغفر لابونا الخافيه من خطاياه
عساه بالفردوس باعلى مكانا
ويارب أكرم له بنزله ومثواه
حنا فقدنا الفهد لاكن عزانا
باللي خلف فهد العروبه بممشاه
عبدالله اللي نورت به سمانا
حنا على حكم الشريعه تبعناه
جينا لابو متعب يوم أنه دعانا
أنبايعه بالحكم يومه تولاه
وحنا لعبدالله انجدد ولانا
يا حي عبدالله ويا حي ذاكره
العاهل اللي تحت حكمه خذانا
مليكنا الغالي عسى الله ياقاه
الفارس المغوار حامي حمانا
انا اشهد انه نادرٍ في سجاياه
ولي عهده سيدي له وفانا
نوفي بعهده دايم نتبع رضاه
اللي لدرب الخير دوم يهدانا
حبيب شعبه ما تعدد مزاياه
بالحب والمعروف خيره غشانا
والجود طبعه والسعد في محياه
سيفٍ على الظالم شطير السنانا
غيثٍ على المحتاج جزلٍ عطاياه
العهد لا آل سعود باول زمانا
ما زعزه خايب ولا خاينٍ جاه
الحكم راسي ثابتات أخطانا
والعدل ثابت باول الوقت واتلاه
ويا لله تصبرنا على مبتلانا
على فراق الغالي اللي فقدناه
وصلّوا على راع الهدى والبيانا
نبيّنا اللي كمل الدين وارساه
"مدارات شعبية"