يا بلدنا ما تزعزعك حيلات الجبان
ولا تحرك فيك شعره فعول الحاقدين
واقفينٍ معك لا جلك على طول الزمان
العيون الساهرة لك كما الحصن الحصين
دام نايف.. نايف اسمه على اسمه لك ضمان
سيدي لا قال وفّا وقاسيها يلين
دام نايف.. نايف الراس وإن شد العنان
سيدي كعم المعادي وكيد الكايدين
دام نايف.. نايف العقل وقت الامتحان
سيدي رمز السياسات والعقل الرزين
سيدي تامر.. وحنا جنودك لك عوان
نفتخر في طاعة الله ثم لك طايعين
نام يالشعب السعودي بامان وفي طمان
يا جبل ما هزك ريح من طول السنين
بان يا وجه الاعادي عليك الله بان
بيني يا عقرب الطينة اللي ما تبين
تختفون بظل الأطفال والعجز الهوان
وتقتلون الأبريا غدر والمستأمنين
لابسٍ لبس النساء تحسب انه لبس امان
ألعن الله من بلبس النساء متشبهين
زمرةٍ تمشي ورا من جهل دينه وخان
ديرته وديانته لين عاش بدون دين
خارجٍ عن دين الإسلام والإسلام أدان
كل من يخرج عن الدين ضد المسلمين
نبي نضيّق حولك الكون ما تلقا مكان
لين يصبح شاسع الكون في عينك كوين
في يمين سلالة المجد ذربين اليمان
وامر حاكمنا المفدى وضربات اليمين
وغمد الله روح من مات في برد الجنان
كل جندي رمى النفس لعيون العرين
والنهاية يالله انك تعلي كل شان
من يعز الدين وترد كيد الحاقدين
"مدارات شعبية"