لا والله الا كدرت والخبر شين
من قو وقعه حطم القلب واعماه
علم سمعته في ضحى يوم الاثنين
في سته وعشرين سته سمعناه
عام الف واربع ميه وست وعشرين
ينعاك ياليث كثيرةٍ مزاياه
ينعاك يا خادم بيوت المصلين
ومع خدمة البيتين مجزل عطاياه
تشهد له النهضة بكل الميادين
مع جامعات ومع مشافي مبناه
ويشهد له المصحف طبع بالملايين
مع كل مسلم عاش بالكون يقراه
وتشهد معوناته لناس ضريرين
ياسرع فزعاته وطيبه لمن جاه
حكيم ومحنَّك زعيم السلاطين
شجاع وسياسي سديدات أرياه
وترجل الفارس عقب كافح سنين
يوم القدر حافه ووصلن مطاياه
يارب جعله ضمن ركب النبيين
وبا على جنان الخلد يارب تجزاه
ولا جله تراني مرخصة دمعة العين
وقليل في حقه لونا نثرناه
واعزي الاسرة واعزي اهل الدين
واعزي الشعب السعودي بفرقاه
والحمد لله بالمقادير راضين
واللي كتب ربي علينا رضيناه
والموت درب وكلنا فيه ماشين
ولافيه حي إلا وهاالدرب ياطاه
وحدٍ بموته ما يحسونه الأدنين
وحدٍ ولوجت بالتمني فديناه
وصلو على من وضح الحق والدين
اللي بعثه الله وحنا تبعناه