مرحوم يا شيخ الملوك وسندها
مرحوم يا رمز الفخر والرجوله
عساك في روضة خصيب لحدها
ويمطر على قبرك روايح ثعوله
من مزنةٍ تنشي ويرعد رعدها
تسقي رياض الفهد عرضه وطوله
يا حاكمٍ قاد الزعامه بيدها
وصعد بها ذروة سنام البطوله
هاز الطوال النايفات وصعدها
زعيمنا اللي بينات فعوله
حاكم وله وقفات كلٍ شهدها
نشهد لفعله والجميع شهدوا له
اللي يحل المعضلة من عقدها
وتصبح صعيبات الأمور محلوله
أصعب قرارات الزمن يعتمدها
تأمن بها دوله وتهتز دوله
عزٍ لمن نفسه تقاصر جهدها
ودار الزمن فوقه وجارت حموله
فهد وتكفي كلمتي عن رددها
اسمٍ يعبر عن كلامٍ نقوله
من روس حكامٍ صدوق وعدها
آل السعود معربين الحموله
تحكم بشرع الله وتحمي بلدها
يوم الفتن تقبل وتقفي عجوله
كم فتنةٍ ماتت وهي في مهدها
وكم عابثٍ بأمن البلاد وقفوا له
المملكة في خير دايم سعدها
الله يديم الأمن واللي سعوا له
في ظل عبد الله خليفة فهدها
خادم لبيت الله ومسجد رسوله
"مدارات شعبية"