يا عين هاتي دموع كان مخزونة
اليوم يوم البكا تكفين هاتيها
من شفت ابو متعب والدمع بعيونه
ودموع عيني على الخدين مصخيها
ادري يابو متعب ان الروح محزونه
وادري عن الدمعة اللي باح خافيها
وادري عن الغالي اللي شدت ظعونه
وادري عن النفس لا من مات غاليها
لكن قلبي وربي فاضت شجونه
يوم ان دمعتك بالمنديل تخفيها
فزّت معاليق قلب باح مكنونه
لبى دموعك يابو متعب ولبيها
ان كنت تبكي فكل الشعب يبكونه
ولو تفتدى الروح بإذن الرب لفديها
يبكي فهد يا عضيد الفهد وامتونه
كل المخاليق قاصيها ودانيها
يبكي فهد أمة الإسلام واركونه
ومآذن في جميع الكون بانيها
وتوسعة بيت رب الكون مقرونه
باسمه على غرة التاريخ يحكيها
ومصاحفٍ في مساجد الأرض مركونه
اقر أولتها وتلقى الفهد مهديها
العاهل اللي به العدوان مغبونه
يعز من قاربه ويذل شانيها
(مات الفهد) كلمة بالحزن مشحونة
ضجت لها الأرض واهتزت رواسيها
حتيش لو هامته في الأرض مدفونة
قبله رسول البرايا قد دفن فيها
على محجة محمد لفت كفونه
تدعي له الناس وتزفه بأياديها
من فوق هامة هل التوحيد مصيونة
لو تنشرى رجعته بالموت تشريها
عسى السحاب المنشي تسبل مزونه
على ثرى تربةٍ بالعدل ماليها
يا الله ياللي جميع الخلق في شونه
ترحم عظامه ومن نارك تنجيها
ولا دام ابو متعب فالدار مامونة
نبايعه بيعةٍ نفتى ونحييها
بيعة ولاء لبو متعب وعربونه
الروح والنفس والدنيا وما فيها
"مدارات شعبية"