جاني خبر واثر الخبر يا عرب شين
والعلم الا قشر والله اني ما ادانيه
قالوا لي ان الموت في صبح الاثنين
اخذ ابو فيصل بتقدير واليه
قلت آه هلي صافي الدمع يا عين
ابكي على فهد العرب يوم نرثيه
مات الزعيم اللي حمى حوزة الدين
هلي عليه الدمع يا عين وابكيه
يا نفس عقبه كيف يا نفس تسلين
وهو الذي كنتي تحبين طاريه
مات العطوف اللي يحب المساكين
مات الذي بالطيب ما احد يجاريه
مات الجواد بحزة العسر واللين
ما فيه حي بالوهايب يباريه
مات الذي له بالوفا دايم ندين
مات الذي عينه على الشعب تحميه
مات الذي للشعب أوفى الوفيين
والشعب بالغالي وبالنفس يفديه
صحيح حنا بدبرة الرب راضين
بس الفهد غالي وبالحيل نغليه
موته فجيعه ونزلت بالملايين
جل المصاب ويا كبر حزننا فيه
والله لو نبكيه حين بعد حين
على ربع فعله فلا اظن نوفيه
الحزن خيم في قلوب المسلمين
وشلون ينسونه وجملة حسانيه
يا الله طلبتك يا كريم الكريمين
يا من تصاريف المخاليق بيديه
يا الله يا خالق ابن آدم من الطين
ترحم فهد وبغاية الخير تجزيه
يا الله عسى قبره رياض ورياحين
ويا الله عسى الرحمه تحوطه وتكسيه
واحشره مع زمرة عباد منيبين
واجعله بالجنات والحور تاتيه
ويا الله يا والي لابو متعب تعين
وتوفقه وتسانده في مماشيه
حنا يا بو متعب على العهد ماضين
ونسأل لك التوفيق والخير نرجيه
نعطيك بيعتنا ونحلف لك يمين
انا رجالك كل ما قلت نمضيه
انت وولي عهدك وكل الميامين
لكم ولانا والوفا اليوم نبديه
والله يخليكم لنا سنين وسنين
وحسودنا فيكم عسى الله يعميه
ثم الصلاة عداد نبت البساتين
على نبي وضح الله مساعيه
"مدارات شعبية"