حداني زماني لين عديت بالمرقاب
وانا جايز من عالي الرجم ما رقابه
صدق من يقول إن القدر دايم غلاب
وأنا أقول يامن تجهله لا تهقوا به
عطاني دروس وافيات بدون كتاب
وعرفت السؤال وكل معناه والجابه
بعد ما لقيت اللي يقولون عاب ذياب
ولقيت العجايب والغرايب من أسبابه
دورت الصديق اللي مع الكود ما يرتاب
وتعبت وقنعت بعلم وقت قفل بابه
يقولون تنسى الهم في رفقة الأصحاب
وأنا أقول بعض الناس بالقول كذابه
بعضهم يسير بسيرة مثل مشي الداب
وبسرد الكلام الزين يكذب على أصحابه
وقليل المعرفه ما معه للأمور احساب
يضيع إبمتاهة قول ناس تلهابه
وأنا منخدع للي يجامل بضحكة ناب
أسولف معه واجامله واخذ حسابه
وراع الهرجة اللي هرجته تتعب الاعصاب
ما هي عادتي لاقال قول أتواحابه
أعز الوافي وأغليه لو هو من الاجناب
واقوم بلزومه واكرمه واتعزوا به
أشيد شراع الطيب واحكم له الأطناب
حسب قدرتي والطيب من حظ كسابه
علي اجتهد واقوم واحرك الاسباب
ودني العمل لو يغري النفس ما رضا به
أنا عارف قول الخطاء وافهم الصواب
واحاول على الصبر القوي واتحلا به
وبرجي المدد بالعون من منشي السحاب
كريم مع التوفيق ما خاب طلابه
"مدارات شعبية"