جروح الروح تبرا غير جرحك يا شقيق الروح
يعاود ويتجدد كل ما مريت في بالي
ملازمني خيالك وين ما وجهت اروح يروح
خويي مثل ظلي معي في حلي وترحالي
خذتني طيبة القلب النظيف المنصح المفتوح
وعطيتك علم ما يعطى ولد عم وولد خالي
أحسب إني بسرني لو حصل مهما حصل ما ابوح
ولكني بسري قلت لك يا قاتل آمالي
عليك الله حسيبي كيف خنت الملح يالمملوح
عساك الاول اللي خانه التوفيق والتالي
طموحي معك والله ما تجاوز حاجز المسموح
ولا حتى بلغت الحد الادنى منه يالغالي
ما هوب عاد اتمادى فالخطا راع الخطا مقدوح
ولابده يطيح من العيون وبرجه العالي
ترى ما لك ولا لي في مزامير الوذا مصلوح
عساهم للذهاب الا عساهم ما لهم والي
ورى حدب الضلوع اسمع بخفاقي نحيب ونوح
نحيب اللي يبي سواقها بطولة الرالي
عسى ربي يكون بعون قلب الهايم المجروح
بعد خلى عليه لحربة القناص مدخالي
شريكي في منامي في مقامي ما انت بالممدوح
ما هو معقول ابا امدح من بخس كيلي ومكيالي
قبل مده حبايب والتكلف بيننا مطروح
واشوفك صرت رسمي حبتين وصرت متعالي
وش اللي صار قل لي لا تحسب إني قصير شبوح
فجوج الله وساع إن رحت رجلي جيت خيالي
فمان الله قبل يفور دمي والدلال تفوح
وابهر دلتي واصبها واسوق فنجالي
وتسمع كلمةٍ تزعلك شفها في سماي تلوح
على فالك فمان الله وانا اروح في فالي
على عز ومعزه حافظٍ قدرك بوسط الروح
غلاك اللي تعرفه يا شبيه الريم لازالي
"مدارات شعبية"