أن جيت وإلاّ رحت غايب عن العين
القلب تايب.. والمحبه توفّت
توك تجي..توك تجي.. بس ذلحين
وينك بوقتٍ فيه الأحزان صفّت
وين أنت يوم أشكي شقا الحب والبين
مجروح منك.. وبك جروحي تحفّت
أقفيت.. دون أسباب في وقتي الشين
وأنا المحبه.. عفتها يوم خفّت
أرخصتني رغم أني أغليك يازين
وغبت وهجرت وشمعة الحب طفّت
عامين مرّن.. معك ياهن عامين
فيها ليالي الهم.. وفت وكفّت
فيها فقد أصحاب وأزعلت غالين
فيها.. عيون الحزن ما يوم غفّت
اصبرت.. لو يقسى بي الوقت ما ألين
ولا قول في الوقت الشقا.. هيه عفّت
عرفت بالأيام درسٍ من أسنين
وقت الشدايد به وجيهٍ تخفّت
وان كان تسأل وين حبك على وين
أيام حبك ياشقا العمر قفّت
معك انتهى حبٍ بليّا عناوين
طويت صفحاته والأقلام جفّت
"مدارات شعبية"