الخيال اللي له رعود وبروق تشوق
كلما لاحت بروقه نخيل اخيالها
صافيٍ مشروبه العذب وخياله صدوق
بأمر ربي والمعاني على تفصالها
كل طرق له لحن والطروق بها فروق
اللحون الحالها والطروق الحالها
ما بغيت اعدد طروق وخلي طروق
المهم المعرفه تعني ويعنا لها
دقت المعنى لها عند راع الذوق ذوق
ينسجم مع جوها والعباد بفالها
ذي حلاة الشعر والجايزة حظ السبوق
المراجل مهرةٍ والوفي خيالها
أن تحدث ما كذب ما يخون ولا يبوق
ميزةٍ يعرف بها والعلوم اكمالها
بارك الله في حلوقٍ يفكن الحقوق
بصمةٍ تبقى لها والعمل يبقى لها
الذهب له سوق غالي وللادباش سوق
والحِيل ما فادة اللي يبى يحتالها
كم سارق يسرق الكحل من عين السروق
ان رقد والا صحا حالة يرثالها
اطرح حلول القضيه وانا قلبي شفوق
وفيه حاجه مزمنه ما طلع حلالها
المذمه تنتشر في دقايق ما تعوق
والمديحه يمكن أتموت ما حدٍ قالها
"مدارات شعبية"