يشفيك رب البيت يا خادم البيت
ياللي فعول الطيب عادة يمينك
يا خادم البيتين.. يا عالي الصيت
نذرت للإسلام ماضي سنينك
في خدمة الإسلام ياما تعنيت
وياما بذلت المال من شأن دينك
وفيت في كل المواقف وكفيت
والله يديمك لامةٍ ذاخرينك
أنشهد إنك بالعزيمة تعليت
يفرح بك اللي قال بالضيق وينك
شعبك يماري بك فخر كل ما طريت
والا انت غير وكلهم خابرينك
قائد محنك بالسياسة ليا أبليت
وامر من العلقم على حاسدينك
اليا التجى لك منظلم ما تخليت
ما فيه حاجز بين شعبك وبينك
بالعطف والحكمة لشعبك تحليت
والخير ياما قدمته يدينك
ياما تسامحت وتغاضيت واعفيت
والعدل كنه منكتب في جبينك
يوم ان غيرك شتّت الشعب تشتيت
يقتل ويفتك ذاك وينه ووينك
والا انت منهو ثبّت الحق تثبيت
والله على حكم الشريعة عوينك
بالسيف دونه شلت رؤوس الطواغيت
وبالحق ماهمك لغى لا يمينك
للشعب فرحة يوم قالوا تشافيت
ما تنوصف ليتك تشوفه بعينك
فرحة غلا ما تنوصف لو تمنيت
يا لله عساهن يمهلنك سنينك
"مدارات شعبية"