البارحة والحزن فالصدر يجتال
دمعي من همومي على الخد سالي
أبكي وفي قلبي لهب يشعل اشعال
يومن بعض الناس داله وسالي
ذكرت خالي يوم نزّل بمنزال
فالقبر يا فارس ولا به جدالي
فارس يهل الدمع ويصيح مهتال
وانا الله اللي عالم ويش حالي
عز الله انه راح لي يا عرب خال
ما فيه مثله في جميع الخوالي
راعي علومٍ وافية تفرح البال
ما هوب من قوم الردى والخمالي
طيبه ومعروفه كما الغيث همال
ما قال فعل الطيب ماله ومالي
مدات كفه كنها السيل لا سال
والله ما يحسب حساب الريالي
وليا لفاه الضيف قدمله الفال
ومن عقب فاله يقتفيه العقالي
يضحكك حجاجه دوم والقلب ما شال
بغضٍ لحد ما يوم فالقلب شالي
لا من ذكرته كن صايبني اهبال
لكن ربي كاتب ما جرالي
يا الله يا عالم خفيات الاعمال
يا الواحد المعبود مرس الجبالي
اغفر ذنوبه كلها خفاف وثقال
يا الله طلبتك يا عظيم الجلالي
واجعل مقره في بساتين وظلال
وفي جنة الفردوس يشرب زلالي
وانك تغفر ذنوبنا يوم الاهوال
وتخلي المسلم طريقه عدالي
يا العبد لا تجزع ترى الوقت غربال
الله يكافينا صدوف الليالي
دنيا تقلب كل يومٍ على حال
وحنا عشقناها ولو هي حثالي
ويا الله يا منزل تبارك والأنفال
اجبر عزانا في كريم السبالي
واختامها صلوا على خير مرسال
اعداد ما لاحت بروق الخيالي
"مدارات شعبية"