من وين ما اجيك الدروب اتضيع ويضيع جهدي
وارجع وانا اللي حالفه عن وجهتك والله لا توب
حلفت ما اتبع لك سراب أو حلم ليل، سرمدي
لا.. لا.. ولا اسمح للعتاب يشرع ابواب الذنوب
ما كنت اظن اني اسيرة قلب رجال اجودي
وان عمري اللي مو معه عمر أبد ما هو محسوب
ياما تمنيتك تجي بحلم يحضنه مرقدي
وياما وقفت اتخيلك بآخر مسافات الغروب
وياما نزفت بغربتك من قسوة الحظ الردي
اللي رماني في اسى لحظات آهات الهروب
ورغم الظروف اللي حدني عن هوى دارك حدي
كنت ألمحك كل ما لمع برق على اطراف الجنوب
كنت أحترق من جور فرقا حلها كان في يدي
لين اصبحت بيدي رماد وضيّعه مني الهبوب!!!
تدري حبيبي يالغلا ياروح روحي ياسعدي
يبقى معك قلبي وفي ما هو مثل باقي القلوب
لولاك يانبع الدفا ما اصبر على ضيم ابردي
ولولا الهوى اللي ساقني ما سرت وياك الدروب
اضيع في دنيا الغرام اللي رسمته وآغدي
واطير مع سرب الحمام اللي غدا بعيني طروب
والبي لصوتك هلا هلا هلا بك يا بعدي
اطلب فديتك ماتبي كله على امرك وجوب
وهموم قلبي والسهد وآلام جرح بي ندي
كله لعينك هاينه يا انت يا اغلى امحبوب
"مدارات شعبية"