قالوا إن الحب سلبي قلت أنا ايجابي
دام قلبي مع خفوقك بالوفا متشابك
ما أحدٍ مثلك غيابه يستفز أعصابي
وما احدٍ غيري غيابه يستفز اعصابك
تفرح إليا من نصيتك واسمع الترحابي
وان حضرت اقول ربي يا حبيبي جابك
خابر إنك في خفوقي انت كل احبابي
وأبصم إني في خفوقك فوق كل احبابك
مودعٍ حبك حبيبي في رصيد حسابي
وشايفٍ قلبي بعيني في رصيد حسابك
تزعل وتبكي وتبعد عقبها ترضابي
والصحيح اني انا ازعل وابتعد وارضابك
وحدك اللي في الخلايق حزت كل اعجابي
يا بعد كل الخلايق يوم حزت اعجابك
من جنوني فيك قالوا عني الإرهابي
سامح الله عاذليني ما دروا بإرهابك
تفرح إليا جيت عاتب تستلذ عتابي
إبك أنا مثلك أعيد لا سمعت عتباك
مسكنك في أقصى عروقي وأنت تحت أهدابي
ومسكني في أقصى عروقك واستحل أهدابك
دربك اللي لا مشيته ينتهي في بابي
مثل دربي لا مشيته ينتهي في بابك
ألمحك وسط الزوايا وفي عيون اصحابي
وانت تلمحني عيونك في عيون اصحابك
تعرف اللي في ضميري دون ما اشكي ما بي
واعرف اللي يجرحك من دون تفصح مابك
والله ان مصاب قلبك اعتبره مصابي
وأدري ان مصاب قلبي تعتبره مصابك
من يقول الحب سلبي ما يجي ايجابي
ليته يشوف الغلا ما بيننا متشابك
أنت يا اللي في غيابك تستفز اعصابي
والله اني معك دايم لا تثير اعصابك
"مدارات شعبية"