دربي طويل وتايهٍ فيه ممشاي
مثل الغريب اللي مضيع دليله
يحدني وقتي على ضيم دنياي
ورضيت بالمقسوم حتى قليله
يا طول صبري وآه يا كبر بلواي
أخفي عن العدوان همي واشيله
أخاف أبوح بسد قلبي وشكواي
وتصير نفسي بين ربعي ذليله
أضحك ودايم بسمتي تسكن شفاي
ومن شاف حالي قال محدٍ مثيله
وأنا بجوفي هم والنار بحشاي
والجرح ينزف والليالي طويله
والعمر يمضي بي وحاير بمسعاي
محروم من طعم الحياة الجميله
الياس حل وماتت اليوم رجواي
ولا عاد لي غير الصبر من وسيله
يا حظي الباير تعثر بك خطاي
يا حيلة الله ما بقي فيّ حيله
يا الله يا عالم بسري ونجواي
تزيل عن قلبي همومٍ ثقيله
"مدارات شعبية"