يا راحلين يمها قولولها عقب السلام
وان كان ما قلتولها وصيت بالعلم بدلا
قولولها باللين لا تقسون معها بالكلام
من كل حب من طرف واحد ترى قلبي خلا
مالي ومال العشق وجروح الموده والهيام
مالي ومال البيض واول حبهن واللي تلا
كم لوعن قبلي مجاريح الهوى شرق وشام
عنتر وقيس بن الملوح والكثير من الملا
هذا قتيل وذا صويب وذاك مضيوم يضام
والكل مجنون ولا في عالم الحب اعقلا
يمكن يلام المبتلا فيهن ويمكن ما يلام
بس الوكاد انه يلام او ما يلام المبتلا
اوصافهن فيها حلا يشبه حلا بدر التمام
لكن سواياهن مع المفتون ما فيها حلا
حرمت عشرتهن على نفسي ولو ما هي حرام
وصديت عنهن صدة اللي عن وطن ربعه جلا
من يوم عارضت الخطر وانا احسب اني في سلام
واودعت قلبي عند سفاح وقتال قتلا
ايام ضاعت من زهر عمري مثل طيف المنام
ما ذقت فيها ما يسمونه مبادلة الغلا
قولولها باح الكنين وراحت ضلوعي حطام
ومن كثر ما ينصب في قلبي من الغيض امتلا
ما عاد يطري لي ولو بالطاري ارجع للغرام
مقدار ما تنطق من الكلمات كلمة يا هلا
وذيك الليالي والونين اللي تخاوى والظلام
ودعتها واجري على رب السماوات العلا
"مدارات شعبية"