قالوا: من اذكى الناس في كل الاحوال
قلت: اسمعوا مني - ترى الشاعر اذكى
لا دوّروا للعقده القيد حلّال
تلقى الذكا جنبه تجلّى.. وتمركى
الشاعر اللي ساق من شعره دلال
واطرب نديمينه، واضحك وابكى
(أبْكْ) انتبه يا عاشق القاف ل (اللال)
لاشالها شاعر.. سبك ذيك سبكا
الشاعر.. ان غنّى على واديٍ سال
واطلق لسان الأعجمي لي تلكّا
يفك سحره مغلق السر في البال
والمقفل المدفون في القاع فكّا
ما شفت لي منّه جلس بين الأزوال
يصير شمعه بينهم لي تحكّا
وان شاف زولٍ يعجبه.. صابه هبال
واهتز مثل الجان، واعطى وتزكّى
الله. ياناشد عن الصبح الى انهال
الله.. ياناشد عن البرق - يذكى
الله.. يا اللي للبحر مركبه مال
ينشد عن اللولو، وللجرح ينكى
هذا هو الشاعر.. وهذي هي الحال
يبيع لولو.. والفقر فيه مركى
"مدارات شعبية"