ابكتب لك قصيده ما كتبها قبلي الشعار
وأنا ماني على قدي وقيفاني تساعدني
أنا الشاعر وأنا الرسام أنا الحساس والبحار
تخصص غطس فحروفٍ تبكيني وتسعدني
إذا طابت لك السهره وأنا فاليل أبو الاسرار
سرقني طيفك اللي كل يوم وهو مواعدني
سريتك حلم وأمال وطموح ومرسمة واحبار
قصيدة حب رسمة طيف تذكار يراودني
عبرت الكون فوق الياس تحت امن الرجا لو جار
تركت شلون فكر الناس لو كانت بتنجدني
رحلت بدون زاد ومي والوجهه صدى التذكار
ورى صوت اسمعه خلف الظروف وناس تحسدني
على شوك الطريق اللي جمعنا يوم كنا صغار
ابوفي للعيون اللي زمان اول تعاهدني
اببقى لك واثبت لو يقولون الفلك دوار
على جمر الطريق اللي بلا لوحات ترشدني
أباصير يا حياتي وأتأهب فوق خط النار
واذل النفس لو كانت على العزه تعاندني
لك آخر ما كتبت من المشاعر وآخر الاشعار
قصيده لا رجعتي قافيتها بالحروف (إدني)
(تعالي) وانقذي شاعركي اللي فآخر المشوار
عطيت الدرب في وصفك خساره كان بعدني
"مدارات شعبية"