يا وين أبا القى من مزاجي مزاجه
يرتاح لي قلبه وقلبي له ارتاح
وين أنت ودي فالزمان أنتواجه
ما عاد لي صبراً ترى صبري انزاح
صبرت لين البال طال انزعاجه
والصبر مل ومدمع الشوق فضاح
مشتاق شوق وحاجتي بألف حاجه
محتاج أسولف معك وأضمد إجراح
شوقي حبيس وفي يديك انفراجه
ما هو بمحتاج مفاتيح وسلاح
الشوق وسط الجوف ولع سراجه
وبيح خفاي وكل شيء له انباح
ما غير أنا والهم شعري اعلاجه
لولا قصيدي كان همي لي اجتاح
أكتب قصيدي مفرده وازدواجه
حبري وقرطاسي وشعري ومسباح
وذكراك يا من ضحكته في حجاجه
والله انا في بحر ذكراك سبّاح
ذكراً عزيزة في الزمن وابتهاجه
راحت عسى ترجع ترى الطيب ما راح
شوفتك عز وضحكتك ساس تاجه
وعرفتك خير أوسام في الصدر لمّاح
وأنا لشوفك ما أتحمل مواجه
أشيل حمل هموم والحمل ما طاح
قال المثل ما طال يصبح سماجه
وتبي الحقيقة طول الوقت يا صاح
"مدارات شعبية"