مرحوم يا شيخٍ فجعنا رحيله
يا الله عساه بجنة الخلد مرحوم
نهار لابار العميل بعمليه
زيزوم لامني تذكرت زيزوم
والعبد ماله بالمقادير حيله
واللي جرى شيٍ مقدر ومقسوم
مالي على تدبير ربي وسيله
إلا الانين وزرق الأعبار ديموم
يومين وأنا بين ليلة وليله
لازان لي شرب ولازان مطعوم
ما غير من الشاذلية وهيله
وكبدٍ تفور وتشرب الهيل وتزوم
حتى غدى ريقي تقل حنظليله
والبال من كثر التفاكير مزحوم
مرحوم ياللي ناصله ونحكي له
ونعلمه لاضامنا الوقت ويقوم
على فراقه حزني يا قبيله
نهار عون اللي من الوقت مظيوم
حمل الحمول إنيا ثقل يرتكي له
رجل الوفا عرضه عن العيب محشوم
لامسنا من سود الأيام ميله
نزين نهار إن جابت أيامنا توم
من روس ربعٍ ينطحون الدبيله
خيالة الوضحى زحازيح وقروم
أهل المواقف والعلوم الجميله
شيوخنا المنديل والعلم مفهوم
شيوخ العمور من السنين الطويله
يا شيخةٍ ما هي جديدة من اليوم
الله يبيحك يا منجي دخيله
ويجبر عزى ربعٍ لهم ذكر وعلوم
أبوك واخوانه وكل القبيله
واخوانك اللي مالحق روسهم لوم
ويجبر عزى بندر وبندر مثيله
نسل الحرار اللي على الطيب مفطوم
وأنا أتضرع وأطلب وأدعيله
يا الله عساه بجنة الخلد معزوم
مع الصحابة بالفردوس الظليله
عساه بالجنة عن النار معصوم
"مدارات شعبية"