التجربة ياخوك هي خير برهان
والنار ما تحرق عدا من وطاها
خذ من كلام اللي تربّى بالأوطان
وعاش وتغرّب عن ديارٍ بغاها
دارٍ سكن فيها قريبين واخوان
يشتاق حتى للنخيل بصفاها
خذا زمان وراحت أزمان وأزمان
وخذا دروس من الحياة وشقاها
وشاف العرب يا خوك أشكال وألوان
سبحان من سوى النفوس ونشاها
هذي نصيحة قيلت بماضي الأزمان
العاقل اللي قالها ما كماها
نصيحة ما قدروها بالأثمان
ولا أقول غير اللي وصلني مداها
لا قمت مرة فاعلٍ خير بإنسان
واتعبت نفسك والأجر مبتغاها
لا تنتظر شكره وردّه بالإحسان
بس أتق شرورٍ تجي من وراها
حتى الرفيق اللي تعرّه ومن كان
خلك حذر وأنظر لها بمستواها
إلا الرجال العاقلة أهل الإيمان
اللي تخاف الله وتوفي وفاها
ولا تترك المعروف ياخوك لا حان
وافعل من الخيرات تلقى جزاها
صنايع المعروف لا صرت حيران
تحتاجها بأوقات سودٍ سماها
واطلب من المولى يجازيك بجنان
ويغفر لك ذنوبٍ كثير خطاها
"مدارات شعبية"