المشاعر ماهي كلمه تنتهي بوصف الشعور
لو أقول إني فقدتك ما أظني قلت شيّ
لا وربي إلا كوني اختفي ماله حضور
لا وربي إلا روحي فارقت تمثال حيّ
لو يطول البعد ابقى للوعد قلب صبور
لو حنيني يبتليني بمنحه موتي بيديّ
لو تهيم الروح جزعا في سما صمت القبور
ما ظميتك والمدافع للمواجع كاس ميّ
صاحبي بالله عود رد لي طعم السرور
من زمن ضحكة شفاتي ماهي لايقة عليّ
ردّ لي حلمٍ بنيته من على شمخ القصور
ودّي لو مرّه ألاقي صدفة تجمعك فيّ
المقادير ارعبتني والوله صوته جسور
والفجر دونك ظلام تسكنه أشباح ضيّ
كل عرق ينتخي بي واشعر بعجز وقصور
وارتمي بين الهزايم وانطوي بالهم طيّ
واترك احلامي تجيبك يستبيحنّ الغرور
ويش اسوي والاماني من هجير البعد فيّ
ويش اسوي في فراقك كيف ياصلك الشعور
إني من دونك حقيقه ما اساوي اي شيّ
"مدارات شعبية"