يا قلب ياللي من غثاء الوقت مليت
سِّبتك جسمي ناحلاتٍ عظامه
مادري علام الوقت يخطي ولا اخطيت
وفوق الخطأ يرسل علينا ملامه
ومن حيرتي في هجعت الناس ونيت
يوم المساء زادت همومه ظلامه
والفكر شارد ينضم البيت بالبيت
والهم زاد وزاد فيني هيامه
كل الفضا ما ياسعاً لو تمشيت
دام الفرح معلن علينا صيامه
في دنيتي تشابه الحي والميت
وازرت عيوني لا يجيها منامه
أخفيت همي داخل الصدر ضميت
واشوف شعري قام يفصح كلامه
يا وقت يكفي زاد همك تعديت
وخصمك من الضيقة يعضعض بهامه
هي لحظةٍ جتني جروحي وسجيت
ومع سجتي أطلق زماني سهامه
يا وقت بدري تتعباً وإن تعنيت
أموت عز ولا تموت الكرامة
يكفيني إني لا نخيت وتعزويت
لي عزوتٍ بالمجد عالي مقامه
يالله ياللي فوق عرشك تعليت
تفكنا من هول يوم القيامة
"مدارات شعبية"