طالبك يارب عفوك والستيرة
يا كريم كل خلقه يطلبونه
بعد ذكر الله بشارك في المسيرة
ضد ناسٍ كل ذنبٍ يفعلونه
شلة الإرهاب عميان البصيرة
سمعوا الخاين وراحوا يتبعونه
العقول ضعاف والأنفس حقيرة
عقب عز النفس رضيوا بالمهونه
من يشجع فعلهم ما فيه غيره
ويش ذنب المسلم اللي يقتلونه
فكرهم تعبان وايديهم قصيرة
لا توحد صفنا ما يهز مونه
مالهم في ديرة الإسلام ديرة
والوطن نحمي ترابه ما يجونه
كلنا دون الوطن نار وذخيرة
مرخصين أرواحنا والمال دونه
أبشري بالعز ياشبه الجزيرة
الوطن دونه رجالٍ يحتمونه
دونه رجالٍ مواقفهم كبيرة
كل خاين يطلعونه من حصونه
قل لطير البوم لو يكثر صفيره
نعنبوه . . ونعنبو من يقبلونه
مدعي الإصلاح محتومٍ مصيره
غشه الشيطان لين أعمى عيونه
عاشوا آل سعود قياد المسيرة
منهج الدين الحنيف يطبقونه
هم سندنا في الكبيرة والصغيرة
ما يعرف الخوف شعبٍ يحكمونه
عايشين بخير وانعامٍ كثيرة
خابوا اللي ربهم ما يشكرونه
"مدارات شعبية"