سلام يادارن خلف قد نزل فيك
الله يعوضه فيك دار النعيمي
ما ودي أشوفك ولا ودي اطريك
من يوم قالوا عنك دار اليتيمي
ما بك حلا يا دار من عقب راعيك
من عقب نورك صار ليلك بهيمي
عقب خلف ما أحد يطبك ولا يجيك
حتى الشجر قدام بابك هشيمي
قعب الشحم والعود الأزرق مماسيك
وبنٍ يساق لكل قرمٍ حشيمي
مع النبا الطيَّب حجاجٍ يحييك
ليا كظم الخايب شوير الحريمي
أبو مناور كل الأحوال يشفيك
افراق مثله ضربةٍ بالصميمي
طيبك اوراثه من خوالك واهاليك
بالجود والا في كعام الخصيمي
عسى الخلف مثل السلف من ذراريك
بارك بعقبه يا الإله العظيمي
عقَّب حرارن بالمواقف تهقويك
على مناهج طير شلوى الكريمي
ابوك يا الدنيا كفا الله بلاويك
تشيبين الناس حتى الفطيمي
يا قل لذاتك وما اسرع معاديك
لمحت بصر خيرك وشرك مقيمي
عوبا تبذين الخفا من يناحيك
ما احدٍ ذكر فيك الوفا من قديمي
الله يرفع يا البناخي حسانيك
ويعيذنا ويَّاك صال الجحيمي
وعلى رسولٍ فكك الشرك تفكيك
صليت ثم سلمت واركع واقيمي
"مدارات شعبية"