حاول يعوضهم حنان الأمومه
قصده ينسيهم جروحٍ معاطيب
رجلٍ كتم بين المحاني همومه
راع المروه والوفا والمواجيب
لا واهنيه في صلاته وصومه
ودّع ورجله ما وطت سكة العيب
والمسجد اللي شاهدٍ له علومه
ينشد ويسأل فاقدٍ منبع الطيب
يا ذا الزمان اللي تتالت سهومه
كشّر بنابه والسلاح المخاليب
ما فيه حيٍ ما تجرّع سمومه
والعالم الله وش بقى بصفحة الغيب
وقتٍ سهومه حق ما هي رحومه
منها الوليد يبيّن برأسه الشيب
والمؤمن اللي شايلاته عزومه
بالدين والتقوى يحوز المكاسيب
يا الله يا اللي فرضنا لك نصومه
متنزّه وحدك عن الشك والريب
تغفر لصالح يا إله وترومه
وتكتب له الجنه وحسن العواقيب
حورٍ ترحبّه وترجي قدومه
في جنة الفردوس عز المطاليب
يا الله عسى روح الفقيد امعصومه
عن حر نارك واللظى واللواهيب
يا رب حقق مبتغاه ولزومه
واجبر عزا ربعه من ابعيد واقريب
الدايم الله والحياة امختومه
والرابح اللي له مع الخير ترتيب
"الرأي"