الله يجازي القرم سلمان بالخير
أمير نجد وفخرها.. عز اهلها
شيخٍ يحل كبارها والمعاسير
لا كبرت القالة وقلت حيلها
انا اشهد انك من رجال مغاوير
من راس قومٍ زيّن الله عملها
مجلسك مدهال الرجال المناعير
وصيتك وصل وعر الديار وسهلها
ودلال عزك بالمراجل مباهير
ومن شرب منها ما يدور بدلها
لك في قلوب الناس حشمة وتقدير
ومنازلٍ يا قل من هو نزلها
هذي خيول العز جاتك مساير
تطلب رضاك وجات بابهى حللها
والحمد لله خصنا بك عن الغير
يادرع نجد الشاهقة يا جبلها
الله يجيرك من صروف ومقادير
ويرفع قدر شيخ الشيوخ وأملها
حبك وحب أهل الوجيه المسافير
ملى ضفاف قلوبنا واشتملها
رمت المعالي ثم جاتك طوابير
ورفعت رجلك عن طماين وحلها
تامر وتنهى وتعطي الراي وتشير
وتردع يا امير اهل الجهل عن جهلها
لا جالك المخطي وساق المعاذير
لقى انك اطيب من عذره وقبلها
شوفتك للمضيوم خير وتباشير
وتزيد في نفس المغرر وجلها
في الحق ما تقبل مع الحق تبرير
وياكثرها حقوقٍ بك الله عقلها
لك رايةٍ بيضا وراي وتدابير
ومثلك الى رام البعيدة وصلها
قلبك كبير ومايجي منك تقصير
وغلاك في قلوب البرايا دهلها
ماجاك راعي حق في حق يا امير
الا رضت نفسه وزالت عللها
ويا امير نجد الخالدة جعلك بخير
يا شيخ نجد وفخرها.. عز اهلها
"مدارات شعبية"