شاعر رقى شم الجبال المويقات
والف من جزال القصايد مواويل
هديةٍ لأرض الحرم والهدايات
هدي النبي اللي شفا للمعاليل
ويا ديرتي لا صار بالوقت ميلات
دونك بياض المرهفات المصاقيل
ودونك عيون للمهمه سهيرات
ودونك رجال للصعيبه حلاحيل
لادبروا اهل الحسد للمكيدات
يلقون دونك يا وطنا رياجيل
قد قال أبو فيصل زعيم البطولات
لا عودت سيفٍ وغراً محاجيل
حنا هل العوجا ولا به مراوات
شرب المصايب مثل شرب الفناجيل
تاريخنا يُنشر بروس الطويلات
يشهد لماضي مجدنا ضمّر الخيل
فهيهات يا تباعة الفكر هيهات
يا أهل الردى يا مدّعين الأباطيل
يا زمرة الإرهاب يا اهل الضلالات
يا شرذمة كفر ورذيلة وتضليل
يا اهل الفتن يا مروّجين الدعايات
لا تزعمون العدل وانتم هل الميل
يا مزهقين أرواح أنفس بريئات
وش ذنب يُتّم وارملات ومثاكيل
زرعتوا الضحكة على ثغر شمّات
ولا جنيتوا غير فرحة سرائيل
واللي تمادى في الزلل والخطيئات
لا بد يلقى في جهنّم تهاويل
ولو واجهتنا في زمنّا صعيبات
المعضلة لا بد تلقى رياجيل
وقد قال أبو فيصل زعيم البطولات
لا عودت سيفٍ وغراً محاجيل
حنا هل العوجا ولا به مراوات
شرب المصايب مثل شرب الفناجيل
"مدارات شعبية"