مات الكريم اللي بدمٍ بكيناه
خذاه من نزَّل تبارك والأنفال
لو كان بأيدينا أبد ما عطيناه
لاشك رب البيت وان راد فعال
لو كان ابن سبهان يفدى فديناه
بارواحنا وأموالنا وكل العيال
تبكيه شمر كلها اقصاه وأدناه
كل الطنايا حزنوا حتى الأطفال
يبكون شيخاً للشدايد فقدناه
شيخٍ شجاع بقمة المجد نزال
شيخٍ ليا ضاقت علينا نصيناه
حراً معرب للصعيبات حلال
مرحوم يا راكان لا من نخيناه
كنه هديب الشام للحمل شيال
كل المفاخر حاشها كف يمناه
عون الضعيف اللي عليه الدهر مال
تطرى المراجل والكرم لا طريناه
كريم يمني بالغلا يرخص المال
يقضى لزوم الناس لا من قصدناه
بيته مشروع للأجاويد مدهال
كل الزعامة بساس راسه ومجناه
ولد المتوقد نازل روس الأطوال
مرحوم أبوه سعود لا من ذكرناه
حصان الطلايب بالمهمات صهال
سعود المتوقد نذكره ما نسيناه
نعم الزعيم وطايل كل ما طال
واليوم أبوك يا حمود مات ونعيناه
وننعي معه طيب المراجل والافعال
كل القبايل ما هو بحنا خسرناه
خسروا كريماً كنه الغيث هطال
وكل القصايد قاصره لو رثيناه
والشعر ما يوفيه حقه والأقوال
يا الله يا اللي بالملمة دعيناه
تجعل مقره جنه الخلد منزال
وختامها نرجع على ما بديناه
يرحمه من نزل تبارك والأنفال
"مدارات شعبية"