يا نجد باكرك السعد بأول العام
أمطار خير وجملك عودة سعود
شيخٍ تحرى عودته عود وغلام
وقصرٍ مشرع للنشاما على الجود
سعود منصا اللي من الوقت منضام
سيفٍ لحاجات المخاليق مجرود
من لاذبه بالنايبه كسبه جسام
يرجع وهو داله ولا هوب ملهود
ياقف معه وقفة شريفين الأقوام
اللي يجنب فعلهم كل منقود
من شبته بالطيب متحيزم حزام
ولا يجازي طيّب الفعل بصدود
المرجله عشقه وهو هايم هيام
فيها ويرخص لجلها دايم الزود
يبذل جهوده لجل تحقيق الأحلام
ولا ذخر من دون الآمال مجهود
نهر العطا كم ورده عطاش وحيام
ورووا وعادوا منه بافراح وسعود
ريفٍ ربيعه يكفي اعوام واعوام
متخالطٍ شيحٍ وقيصوم وورود
دين وتواضع تشهد صفوف وايمام
وعقلٍ بحسن العاقبه تقل موعود
عرفه شرف يفخر به الخاص والعام
وكنزٍ اليا جت حزّت البيض والسود
صيته شمخ وسعود من روس الاكرام
كنّه بوسط المملكه شامخ الطود
اللي سمع بسعود يبصم بالابهام
يشهد وهو عند الاجاويد محمود
فيه الفخر متوشح درع ووسام
وعن الطمان بقمة المجد موجود
يفعل ولا يرجي ثنا شعر واقلام
ماهوب يرجي من ورى الفعل مردود
الا من المعبود خلاق الانام
بيوم الحساب اللي به الربح والفود
الله عساه ينال مردودها تام
من ربنا المعبود هو خير معبود
يا نجد دام سعود ما يشكي آلام
ما للفرح يا نجد بقلوبنا حدود
الحمد للي فارضٍ حج وصيام
دام ان ابو خالد تعافا من الكود
الله يحفظه دوم في كل الايام
آمين ويبدد شقا كل مضهود
"مدارات شعبية"