مرحوم يا شيخ تقافت إنجوعه
من عقب مشوار حفل بالفعايل
نفسه على كسب الجميلات طوعه
ومن طيب قلبه ما هرج بالنقايل
عسى كريمات الفعايل إشفوعه
يوم الحساب اللي بيوم الهوايل
عزاي للي به تذارف دموعه
بندر وربع كاملين الخصايل
مجموعة لا فرّق الله جموعه
اعيال ابن وايل مع أحفاد وايل
والصبر بالصدمه حميده إشروعه
ومن يحتسب يجزي بخير الحصايل
وترى الخطا من كان نفسه جزوعه
والصبر مطلوب بكل الوسائل
ما فيه حي كود بقعا تلوعه
ذي سنة المعبود نازل وشايل
كم واحد نومه على راس كوعه
جارت عليه أيام سود الدغايل
امر المقدر ما نخالف سنوعه
نرضى بما يكتب جليل الفضايل
يا الله يا محي المحل من رجوعه
تغفر لبو بندر ذنوب وخمايل
وتسقيه من لذات طويا متوعه
وتجعل له الجنة مقر ومقايل
"مدارات شعبية"