حبيبي وش بلاء حالك تغير يا حلي الذوق
لك الله من بعد صدك قصيدي عاند أوراقه . .
حبيبي ما أقدر أتحمل يجيني في هواك عقوق
وأنا والله لو تدري عيوني شكثر مشتاقه ! !
خذاني ما يخاف الله عذولٍ حاسدٍ مطفوق
نقل عني كلامٍ لا جمل لي به ولا ناقه . . !
عذولٍ بالهوى همه يطوقني الملامه طوق
يبي أنساك يا خلي كذا من الباب للطاقه . . ! !
وأنا لو تكشف الخافي تلاقي صدري المخنوق
رسم لك داخله صورة وحطك (كل عشاقه)
حبيبي عاشقك إنسان من دم ولحم مخلوق
أحاسيسه تموت ليا نوى خله على فراقه
وإذا هو ما هطل وصلك ولا لك في سماي بروق
ترى لك صاحبٍ نوّه يهل بضامي أحداقه ! !
حبيبي وإن طرى حبك رفعت الرأس فوق الفوق
وتخليتك قمر غايب وذكرك شمس شرّاقه
ألا يا حرقة الخاطر ألا يا دمعة المحروق
خذت مني السنين وعادة الأيام سرّاقه ! !
حبيبي والعمر رحلة غيابٍ زاد فيها الشوق
وترى ما يذبح العاشق سوى لازادت أشواقه ! !
"مدارات شعبية"