يا قلم وان جيت بكتب لي قصيده
والله اني يا قلم قلبي هواوي
وإن بغيت أكتب معك جمله مفيده
قامن براسي يدورن الهقاوي
لا رسمت البيت بالهاجوس أعيده
قلبي العاشق ترى ما هو بقاوي
والهوى لا حل بالشاعر رصيده
كاش ولا دين تلقاه متساوي
والعيون ليا غفت لو هي سعيده
صار حلم يحلم لو ماني بناوي
يطرب الخافق مع الشعر ونشيده
لا ذكرت أيام والخاطر خلاوي
كل يوم ودي أكتب لي جديده
مع سكون الليل والقمرا مخاوي
لي مع الذكرى تجاريب عديده
تسرح الذكرى ويمسى الهم ضاوي
من كثر ما أطرب على جو القصيده
كني مع الشعر والشعّار راوي
"مدارات شعبية"