يا الله يا الله والله ما خاب طلابه
السماوات سبع وانت بانيها
الأجل تعلمه والرزق بكتابه
والخلايق عليم في خوافيها
يربط ابليس في شهر سعينا به
والقصايد تربط في قوافيها
والشعر نطلقه والناس تقرا به
والقصيدة تفسرها معانيها
الشعر ما نقوله غير بأوجابه
موهبه من ولي العرش معطيها
ولا نبيع القصيد ولاشرينا به
ونعرف من يبيعها ويشريها
من يبيع الشعر ماقدر آدابه
مثل منهو يكحلها ويعميها
وما مدحت البعيد ولا اطرق ابوابه
ولا راسلت الثعالب أو حراميها
شعرنا بالوطن ماشجع ارهابه
الفتن سود الله من مشافيها
وسود الله هل الارهاب واصحابه
والمكايد تعود لنحر راعيها
يا قصيدي تفاخر في اسد غابه
بندق الشعر لا تقصر مراميها
خير الاسماء الله المعبود حيا به
واسم عبد الله من خيار اساميها
الشعر عند قصره نوخ ركابه
والقصايد عليه اليوم نهديها
المعاني طوال قصار ترقى به
والقصايد لغيره مانعنيها
الشعر يوم قابلناه هلا به
ابو متعب غلاته ما نخفيها
يوم عيد الطفل هو لبسة ثيابه
عيدنا شوفته عاده ونمشيها
مسجد ابوه بأول عيد صلابه
سنة كل عام ما يخليها
وعايد المسلمين وواصل اقرابه
والمشايخ كبار السن ياتيها
يا الله انك تطيب قبر من جابه
رحمه لوالديه ومنك نرجيها
ومنك غيث وسحاب لنجد وهضابه
وروضة خريم وقت الوسم تسقيها
ووين ما بيت الكرم تركز اطنابه
حيث حاتم زمانه طالع فيها
كالأسد حوله اشباله من اصلابه
وكل قوم تفاخر في بنيخيها
يوم يقبس من اشهر نار مشهابه
سيرة اخوالهم طيب مباديها
وانت قمة جبل كل تذرا به
من وصل لك وصل قمة معاليها
فاز من عطفكم يا امير يحظى به
شوفتك غاية الروح وامانيها
لك ظلال بوقت الحر نلجا به
وكلمة ابشر من لسانك محاريها
"مدارات شعبية"