آه يا قلبي اللي من عنا الوقت جايد
كلما راح همٍ جاء بقلبي بداله
أتصبر وصبري ما طلع له فوايد
والرجاء في ولي الكون والمشتكي له
طول وقتي ما غير انظم واسوي قصايد
وأكثر الناس يحسبني عن الهم داله
ما درى ان الزمن يتعب وسيع البنايد
عكر الوقت جوه والزمن ما صفى له
ذاق مر الدهر والحمل جاير وكايد
يجحد الضيم بين الناس لو ضاق باله
ثابتٍ في مواقيفه مع اهل العوايد
ولا تردد ليا جا فاللوازم مجاله
وان تشابه عليه الأمر ياقف محايد
لين يطلع مثل نور القمر في كماله
ما تفوه برايٍ ينعكس رون سايد
ينطق الحق بين الناس في كل حاله
يسلم اللي على النفس وهوى النفس سايد
اشهد انه من رجال الوفا والشكاله
يستحق الثنا في بدع كل الفرايد
دام باعه طويل الوفا وطايلاتٍ حباله
ينشرى عرف راع الطيب لو كان نايد
ودك انه رفيق وحالتك مثل حاله
والله ان الرفيق اللي به الطيب زايد
كل عاقل يعده ذخره ورأس ماله
ما تعرف الرفيق الا بوقت الشدايد
لا ظهدك الزمن حمل الشقا عنك شاله
ماقفه معتبر من بين كل البدايد
يرخص الحال قبل المال من طيب فاله
"مدارات شعبية"