لك بالحرم ذكرٍ وفي طيبه أذكار
ومسلمٍ باقصى البسيطة دعا لك
ياسيدي جيتك وانا فيك محتار
فكر تفاخر بك وشعر انتشى لك
اقول وايش اقول واعيد واختار
والمجد لم عمامته وانتمى لك
يا خادم البيتين جمعت الأشعار
وتبعثرت في واحدٍ من فعالك
إنك زعيم العلم والعلم لك صار
ياقائد الأجيال لارقى المسالك
بنيت نهضة مجد بأفعال وأفكار
إجابة النهضة تسابق سوالك
صحراء الوطن صارت من ايدينك اشجار
ثمر وماي وظلها من ظلالك
زرعت دنيانا رياحين وازهار
في موطن بالعين والقلب شالك
منته بحاكم قطر قل حاكم اقطار
بالخير والمعروف تركض جمالك
أبوك صقرٍ والصقر خلّف أحرار
منزلك بأعلى منزله والمدى لك
ولك بالزعامه رعد وابروق وامطار
تعطش وتروي من نوابع زلالك
عبرت في درب الوفاء كل مضمار
وبدرك على الفزعات سابق هلالك
يا عقل يبني شور ويدمر اشوار
لاقمت بالاشوار تفتل حبالك
في السياسة تمتطي كل الادوار
إلا الخيانة ما توقف قبالك
تنطق وتصمت حكمتك كل ثرثار
تصمت وتظهر حكمتك في جلالك
من هيبتك كن الوطن حوله اسوار
اذا العدو فكر يخوض المهالك
وحفظت الامة من ردي كل غدار
بشعبٍ تعلم من وفاك ووفا لك
تظفر على رغم المعامع والاخطار
نومست قومك طيب الله بالك
إن جئت اقل فارس ولا الفين مغوار
وان مر طاري الجود مالقى مثالك
تكبِّر الاقزام لو دهرهم جار
وتقزم العملاق لو ماصفى لك
فهد ابن عبد العزيز اعنف إعصار
إذا تلوى من حمى الدار هالك
وتشوف ابو فيصل سناء يشعل انوار
إذا الصديق اغنم في ليل حالك
لبيك شعبك شعب وديارك ديار
وإذا دعا الداعي فحنا رجالك
كل البشر تنظر لنا نظرة إكبار
مجدٍ صنعته ثم برضاه جالك
شاطئك بحر وغبِّتك تغمر ابحار
تعطي يمينك ما لا تعلم شمالك
بين الصفا والمروة اخبار واخبار
وفي روضة المختار يوسع مجالك
شاد النبي المصطفى سيد الابرار
باعمال تعرفها وباعدّها لك
من يطبع المصحف ومن يحفر آبار
ومن جنب المسكين درب المهالك
لبيت واجريت المناهل بالاقفار
وبذلت للمصحف حياتك ومالك
وصار البحر من عزمك اعذب من انهار
يا غايث المهلوف هذي سبالك
الله له في حكمته علم واسرار
يوم ذلل الصعب القوي من خلالك
ابشر بظل الله لازاغت ابصار
من رحمة الله ثم كثرة اعمالك
يشهد على الكفار (بوذا) و(عشتار)
وتشهد لك (البيتين) يا طيب فالك
الله يجيرك من ملمات الأقدار
وحنا على النهضة نشاهد نضالك
ويحفظك ربي عد ماطائر طار
واعداد ما سار البحر بالفوالك
يا سيدي توجت فكري بالاشعار
ثم انتهى لك مثل يوم ابتدى لك
"مدارات شعبية"