رجواي باللي عليه المتكل والاعتمادي
وما خاب عبدٍ على رب المخاليق اعتماده
رحيم يحيي هشيم القاع من وبل الغوادي
وحكيم فيما حكم واراد له حكمه واراده
سبحانه اللي رفع سبع السموات الشدادي
اللي دحر بالبحر فرعون وجنوده واباده
اللي رفع واصطفى آل سعود من بين العبادي
لخدمة الدين والبيتين من جملة عباده
اخوان نوره هل العادات خطلان الايادي
يستاهلون المديح ويستحقون الاشادة
يالله لك الحمد مسلم والسعودية بلادي
وكم واحدٍ قال ياليت السعودية بلاده
يارب سلم رياض العز من كيد الاعادي
ويارب سلم لها سلمان نبراس السيادة
شيخٍِ كريمٍ وشارات الزعامه والمبادي
على محياه مثل الشمس وافعاله شهاده
رمز الوفا والنقا بحر الندا عوق المعادي
شيخٍِ بذل للوطن كل اهتمامه واجتهاده
يا ابن الوطن لا يغرك من يدادي فالروادي
مهما جرى مملكتنا ثابتة شعب وقياده
والحق بين ولكن لا حياة لمن تنادي
كم واحدٍ تاه واعماه الجهل وابليس صاده
يارب تهدي شباب عن طريق الحق غادي
ومن لا اهتدى وارتدع يارب عجل في نفاده
واليا بغيتوا وكاد العلم والعلم الوكادي
المجرم يقص والمجنون يربط فالعياده
تطمني يارياض المجد وان صاح المنادي
دونك رجالٍِ على العدوان ما فيهم هواده
عبّرت عما يجول بخاطري قدر اجتهادي
وكلٍ يعبر عن اشعوره وما كنه فؤاده
والختم صلوا على خير الملا ماسال وادي
ومازحزح النور ديجور الدجى واقفا سواد
"مدارات شعبية"