يالله ياللي من فضايلك عبدك في نعيم
خالق الكون والنفس بامره زايله
الطف بحال المخاليق يارب عليم
وكفنا يالله شر الصدوف المايله
مالنا غيرك وبك نستغيث من الجحيم
يا رجانا يامن الغيث من دلايله
وارحم اللي بعد فرقاه حالي مستهيم
الهموم بداخل القلب بعده جايله
واسكنه يالله فردوس جنات النعيم
بدله دار وجار وزوج وعايله
بوي عزوه من تعزواه يشكي كل ضيم
تشهد شيوخ القبايل على جمايله
ريف ربعه يوم فقر الزمان اكبر خصيم
درع وحجاب ابن عمه يمينه طايله
فرحه اضيوف تدور على بيت الكريم
جاد ربي فيه ويجود من جزايله
مثل عدٍ للمظاهير وردٍ مستديم
المناشي طيب والطيب من فعايله
لابتي يوم ارتحل منهم الشيخ الحكيم
الحزن بوجيهها والعباير سايله
والصديق الصادق يذوح من قلبٍ سليم
يوم فارق له صديق علومه هايله
بوي تبكيه المقانيص من عهدٍ قديم
بندقه تبكي على الصيد في خمايله
منزله والخنجر الكفو والوصف العديم
والشهامه والمواقيف عنه سايله
بوي من فرقاه تشكى الديار وتستضيم
ناحت الورقا بروس الغصون المايله
يا خساره واتعوذ من ابليس الرجيم
مات سعد الجار يا وينهو بدايله
المفارق حل والكامل الله العظيم
كل وافي شاجع نوَّخت رحايله
اشتكى لله والجرح في قلبي جسيم
قلبي المرباع وجروحي اللي حايله
بعد موته كني اعيش في ليلٍ بهيم
ما بقى لي من بجيله ولا باخايله
اطلبك يارب ما ذعذع ابراد النسيم
ما برق براق صيف نثر همايله
اسكن ابن هيف يالله فردوس النعيم
بدله دارٍ وجارٍ وزوج وعايله
واجعله مع صفوه الخلق في روضٍ مقيم
طيبه من المسك والحور من حلايله
واعتقه يارب يوم الصراط المستقيم
في نهار تشخص العين من هوايله
والصلاة إعداد نو تسابق وسط غيم
هلت امزون المطر وانسكب مخايله
على الرسول اللي دعا الناس للدين القويم
ارسله ربه وزكاه في عمايله
"مدارات شعبية"