تبت يد الإرهاب ملعون من باب
يوم انفتح شفنا الوجيه الشريره
يا حيف منا وانعموا صاروا أغراب
كسيرةٍ يا شينها من كسيره
ناسٍ سقاهم سمه الداب أبو ناب
يوم انتهى حتفه وقرب مصيره
صاروا بلا مبدأ إرهاب بلا أسباب
عدونا غر العقول الغريره
حلل لهم ما حرمه رب الأرباب
لا دين لا دنيا وعمياء بصيره
من ينتحر خايب ومن يدعمه خاب
جاهل عدوه حمله بالذخيره
يا زمرةٍ ما بين كاذب وكذاب
ما فيكم اللي فيه للدار غيره
وش طبكم حارت بكم كل الأطباب
ابن الوطن يرضى عدوه يديره
طعتوا عدو في داركم شب مشهاب
دارٍ ومن شعبه ويأمن قصيره
اللي بداره طاوع أغراب وأجناب
هذا تبرأ منه كل الجزيره
ما عاد له بالشعب عزوه ولا اصحاب
اللي على داره يجر الجريره
يا إرهاب ديرتنا لها اوتاد ,اطناب
على الفواسق والموارق عسيره
المملكة دار العطاء حصن الأشناب
دارٍ حشا لاما تشبه بديره
شعبٍ ربا فيها معزز ومنهاب
ماهمهم زمرة حثاله حقيره
متكاتفين وكلهم ربع وأقراب
شعب وحكومه قوةٍ مستديره
من طاب طابوا له ومن شان ما طاب
عدوهم دايم حياته حسيره
يا خادم البيتين فكّاك الأنشاب
حنا معك مثل السيوف الشطيره
وولي عهدك للوطن كله حجاب
أخو فهد يا سعد منهو شويره
حرٍ تعلا واعتلى فوق مرقاب
يصعب على خاين وطن يستثيره
اللي بفعله يتم أطفال وش ثاب
عود على داره وهذي معيره
من حثكم غرر بكم عاب ما صاب
والمسلم الصادق يراجع ضميره
حرف النصيحه يدخل قلوب الألباب
ويقال من سلم سلم وألف خيره
كفوا وتوبوا غيركم عود وتاب
ومن تاب صاب الله لعبده نصيره
تمت وصلى الله على سيد الأحباب
محمد أفضل خلق وأفضل مسيره
"مدارات شعبية"