البارحة ليلي هواجيس وهموم
زادت عن الحد المقنن زياده
بأسبابها عيني جفت لذة النوم
ومحارب خدي نعيم الوسادة
صار السهر لي بدة الناس مقسوم
وعند الأخير أصبح على العين عاده
أمر من الله وأمر الإله محسوم
ما ينفع المخلوق كثر اجتهاده
يقطعك دنيا كلها أوهام وحلوم
يومٍ شقا واليوم الآخر سعاده
واليا بكيت اليوم مانيب مليوم
ولا لي على رد المقادير راده
قلبي بكى شالح وهو قايد القوم
القايد اللي يستحق القياده
القايد اللي في المهمات داهوم
ما يرتعش لاجا الملاقى فواده
طيري غدا ومن اول يكسر الحوم
وأنا أتحرى كل يوم هداده
يا ونّت اللي كل ما يقيل مرحوم
تنزع معاليق الحشا من فواده
أتلى العهد به فوقه القبر مردوم
فوقه نثيل القبر مثل الحماده
عساه في جنة عدن دايم الدوم
يا خالقٍ خلقه ومحصي عباده
عسى السحاب اللي منشي له غيوم
يمطر على قبره ويسقي بلاده
يمطر على قبرٍ سكن فيه شغموم
يسقي ثرى قبره وينس براده
"مدارات شعبية"