راح الزمان اللي به الطيب ينقال
وجانا زمان فيه همّ وغرابيل
زمان فيه تغيرت كل الأحوال
فيه الردا مالوف والطيب تحصيل
فيه الردا ما يعذلك فيه عذال
ولا يلحقك من ترك واجب مرازيل
أبوي وصاني وصيه لي وقال
احذر زمانك واترك القال والقيل
أوصيك يا وليدي تبي تصير رجال
لا تجلس إلا في مجالس رجاجيل
أوصيك خلك عن تخاريف الأقوال
خلك رزين ولا تماشي مهابيل
وخل التتن يابوك التتن غربال
ولا تروح للمقهى وتشرب أراجيل
يابوك خلك للرجاجيل مدهال
وخلك على ما قيل راعي معاميل
يابوك شب النار وبهّر لنا دلال
وقرّب إبريقك للجمر واضبط الهيل
يابوك كنا قبل بدو ورحال
نخاف ما نصبح إذا اظلم الليل
يابوك كنا قبل ما نملك ريال
عيشه بسيطه بس فيها تساهيل
والجار كان الجار للجار شيال
يشيل عنه كايد الهمّ والويل
على زمنا شايله أمك أحمال
تكنس وتطبخ فبيتها تحط وتشيل
كانت تربيكم على زين الأفعال
وكانت توصيكم على الوصل بالحيل
كانت إذا قلنا ترى الضيف نزال
سوّت قراها يبيّض الوجه وحليل
رجالية تسوى لها ألف رجال
أقولها من دون زيف وتمثيل
واليوم شفنا تغيرت حالنا حال
تغيرت أحوالنا وصار تعديل
عشنا التطور وقتنا كله أشغال
حتى الوصل ننساه جيل بعد جيل
هاذي وصاتي يا ولدي احفظ القال
خلك على طباعك ولا تضيف تبديل
أنت ولدي يابوك وبكره لك عيال
افطن تغير ثم تجر المواويل
"مدارات شعبية"