متى الشمال وطاري البرد لا طاب
ومداين القيصوم يمطر سحابه
ومتى سماه من البها يلبس ثياب
والوبل يشعل برق ليله ربابه
وصحاري الروثة متى تزهر اعشاب
ومتى سحاب الشيح يندى ضبابه
ومتى الفيافي تنبت الورد واطياب
والروض يشرق كل صبح ترابه
ومتى الكرز والتين وحقول الاعناب
ومسايل التفاح تنبت اشعابه
ومتى جليده يروي الأرض لا ذاب
وتربع الريضان وتزهر هضابه
ومتى عروق العشب تندى وتنساب
وعبيرها يشوق منهو مشابه
ومتى القمر يشعل قناديل الاحباب
وتضفي مصابيح السعادة حجابه
وبيت الشعر يلبس من الطيب جلباب
وعطره يفوح اليا تعلت اقطابه
وشلون مدري كيف تسكن بالاهداب
مدري غلا مدري ولع أو صبابه
لكن كتبتك بالورق حب واعجاب
واشعلت ليك بالمحبة كتابه
"مدارات شعبية"