طالت ليال الفراق وضاعت العمله
والشوق نارٍ بعمق القلب مغمورة
فيما مضى ناخذ الأخبار بالجمله
واليوم لا عاد لا صوتٍ ولا صورة
يسقى زمانٍ شملي معا شمله
والعشق موسم ربيع نقطف إزهوره
والبال مرتاح والأفراح مكتمله
والوصل موجود والأحوال مستوره
نسامر الليل الأسود ونتخاصم له
من تحت نور القمر ولاّ على نوره
كنّا نحط الهوى في القلب ونحمله
دارٍ على الحب والإخلاص معموره
عز الله إن المفارق حملته حمله
تلوي ذراع الشديد وتجرح إشعوره
اشوف الأيام ترسملي وترسم له
إحطام سفنٍ بجال البحر منثوره
الصبر واجب ما دام النفس محتمله
لكنّها النفس منهيّة ومأموره
لا يا وليفٍ عرفته زين وأفهم له
ذكراك في القلب طول الوقت مذكوره
يا صفوة الحسن نشهد له ونبصم له
بالعشر والنفس مبتهجة ومسروره
كل الوصوف الفريدة فيك مكتملة
يا ناعس الطرف والأهداب منشوره
أبا أختصر كلّ ما في البال في جمله
والبعد نارٍ على العشّاق مأموره
واليوم صار الهوى والحبّ والعملة
طيرٍ بلا ريش والجنحان مكسوره
"مدارات شعبية"