فرحان يومٍ إنك بدعت وتفنّنت
وغنيت من زود الغلا عذب الألحان
بدعت من زين المعاني وبرهنت
وصعب القوافي طاوعن لك بالأرسان
شاعر وفي شعرك قريت وتمعنّت
وحاولت أجاري فكرتك قدر الأمكان
تدعي وأنا يا مسخر القاف أمنّت
والناس تدعي صدق حضرٍ وبدوان
لشيخٍ فعوله تشمل العود والبنت
والأرمله واللي من الحمل عجزان
سلطان بقلوب القبايل تسلطنّت
وحطيت لك في صفحة المجد عنوان
وفي عالي القمة رقيت وتمكنّت
وطلعت من كل التجاريب كسبان
بفعل الكرم والطيب والجود زينّت
صورتك مع كل العرب سرّ وإعلان
تعطي ومع كثر العطا ما تشينّت
وجمايلك كثرت بذربين الأيمان
وان لانت قلوب الرياجيل ما لنت
تثبت بيومٍ عافت النوم الأجفان
رفعت راسك في المحافل وطمنّت
روس العدا لا ثوّر الحرب دخان
حرٍ لعكفان المخاليب سكّنت
تملك مجال الحوم يا طير حوران
حقت المراجل في يمينك وهيمنت
وعسفتها والبستها سرج وعنان
سمعت مدحك من هل المدح وأذعنت
وفرحت من فرحة أبو سعود فرحان
"مدارات شعبية"