أنا يكفين صمتي طال.. صدك يتعب المجروح
أحضن الهم بضلوعي ودمعي أذرفه بسكات
وأصيح بصوتي العالي ألا يا دنيتي والروح
تعال وبدّد أحزاني ترى عمري قضى حسرات
غيابك يجرح المشتاق وقلبه بالشقاء مذبوح
يناجي بالدجى طيف الغلا لك يا وجود الذات
أجيك اشكي من جروح الليالي والسهر والنوح
أبي نفس الحنان اللي تجيني به بوقتٍ فات
أجيك بصفحة كتاب الغرام اللي معك مفتوح
وتقراني بحروف آهات حبك أرسم الأبيات
أجيك بلهفة أشواق الزمان ورغبتي للبوح
أحبك ما حسبت اللي مضالي منك والغلطات
تغيب وصورتك بالعين وكل شافها بوضوح
وتبقى لو هجرت القلب أساس الحب واللوعات.
يوسف المطلق /عنيزة | 
"مدارات شعبية"