يا مشقي نفسك على غير مصلوح
ريّح ضميرك لا تتعب ضميرك
كم واحدٍ مثلك من الوقت مجروح
هون على نفسك عسى الله يجيرك
يا كثر ما جا من عنا الوقت ويروح
مار انتبه من عالم تستثيرك
بعض الأوادم لا نوى الشر مفضوح
احسب حسابه لا يغير مسيرك
يدخل عليك بصيفه تاخذ الروح
ومن النزاهة والنقى يستشيرك
وإلى غفلت يجيك طامع ومشفوح
ولا يقتنع لين ايتحكم بخيرك
ياكل حقوقك وان غدا الحق بوضوح
يصير همك في حياتك خشيرك
ظالم وراع الظلم ما هوب مسموح
بالله قلّه وش نهاية مصيرك
كم دعوة تلقى لها باب مفتوح
وتنزل عليك مصيبةٍ دون غيرك
هذي حقيقة ما بها ضحك وامزوح
راجع احسابك قبل وقتك يديرك
كم واحد مثلك عن الظلم منصوح
جاه النذير وموت قلبك نذيرك
"مدارات شعبية"