يا سعود جتكم من وطنكم سحابة
تسوقها ريحٍ بالأشواق تنساق
غطّت سماكم.. بالغلا.. والمهابة
شق المدى صوت الرعد عقب برّاق
يا سعود شفها واستلذ بشرابه
تروي ظما عروق الوله بارض الاعماق
ترى الوطن.. يفخر بخيرة شبابه
اللي كسا شهادة العلم.. باخلاق
حان القطاف.. وحان يوم انتخابه
الطالب اللي يحفظ العهد ميثاق
ودع بلاده.. في طريق اغترابه
على الرجا.. ذخرٍ إلى عاد بعناق
مثله سفير وحب داره زها به
على جبينه.. بيرق العز مشراق
معنى السفارة واسع اليوم بابه
ما هي مكاتب لا.. ولاهيب باوراق
كل سفير بكل موطن وطى به
وانتم عناوين الوطن بين الاعراق
بندر سفير المملكة ينتخى به
وانتم له اعوانٍ على كل ما لاق
كان القيم واصل المبادي تشابه
خصايص بلادك على غيرها فاق
يا سعود! قل للي يزيد ارتيابه
حنا هل التوحيد واسلامنا راق
نادى على خير العمل والحَبابه
دينٍ على صنع الحضارات سبّاق
فيه الامان لكل منهو ارتضى به
ومنه السلام يشع في كل الافاق
ويا سعود لا هلّت صدوق السحابة
سبِّح وهلِّل واشكر الرب رزاق
وارفع يدينك واطلب اللي سقى به
يحفظ بلادك من (عفَن) كل بوّاق
ويا سعود جتكم من وطنكم سحابة
تسوقها ريحٍ بالاشواق تنساق
"مدارات شعبية"